अजूनही चांदरात आहे - दोन शब्द

 अजूनही चांदरात आहे 

दोन शब्द 

आज कोजागिरी पौर्णिमेच्या सुमुहूर्तावर हे  पुस्तक प्रकाशित होत आहे याचा आनंद आहे. त्याचबरोबर आपल्याला आवडणाऱ्या अशा प्रकारच्या ललित लेखनाचे हे नवीन पुस्तक आपल्या हाती सोपवताना हा आनंद द्विगुणित होत आहे. दुधात साखर म्हणतात ते हेच असावे ! ' अजूनही चांदरात आहे ' हे या पुस्तकाचे नाव वाचून कोणाला हा कथासंग्रह आहे असे वाटेल तर कोणाला हा एखादा कवितासंग्रह आहे असे वाटू शकेल. पण हा माझ्या इतर पुस्तकांप्रमाणेच विविधरंगी ललित लेखांचा गुच्छच मी आपल्यासाठी घेऊन आलो आहे. मानवी जीवन हेच मुळी सुखदुःख, आनंद, उल्हास, आशा निराशा, चिंता, भय यासारख्या अनेक गोष्टींनी आणि भावभावनांनी भरलेले असते. जीवन एकांगी किंवा सरळसोट अशा प्रकारचे कधीच नसते आणि नसावे. तीच तर खरी त्यातील गंमत आहे. 

या विविध प्रसंगांना, घटनांना सामोरे जाताना मानवी मनात विविध भावभावनांचे तरंग उठणे हे अगदी स्वाभाविक असते. संवेदनशील मनाला तर जीवनातील विविध प्रसंग स्पर्शून जातात. कधी अस्वस्थ करतात, कधी निराशा जागवतात, कधी आनंदी करतात. पण असे असले तरी माणूस जगत असतो ते उद्याच्या आशेवर. त्याला माहित असते की हेही दिवस जातील. निराशेला कधीच आपल्या मनाचा ताबा घेऊ द्यायचा नसतो. म्हणूनच या पुस्तकाचं नाव ' अजूनही चांदरात आहे' . चांदरात, चंद्र, चांदणे या गोष्टी जीवनातील आशेच्या प्रतीक आहेत असे मला वाटते. 

अशा प्रसंगी कुसुमाग्रजांच्या कवितेतील ' कशास आई भिजविसी डोळे, उजळ तुझे भाळ, रात्रीच्या गर्भात उद्याचा असे उष:काल या ओळी मला आठवतात आणि आश्वस्तही करतात. त्याचप्रमाणे अन्नदाता या चित्रपटातील ' रातोंके साये घने  ' हे निराश मनाला उभारी देणारं गाणं मला आठवतं.  जीवनातील विविध प्रसंगानुरूप सुचलेले हे लेख आपल्या मनाला स्पर्शून जातील. 

एखाद्या फुलांच्या हातात जशी विविध रंगांची फुले असावी आणि तो हार शोभून दिसावा, तसेच आपल्या जीवनातील विविध प्रसंग, विषय हाताळण्याचा प्रयत्न केला आहे. सण उत्सवापासून ते आजचा सोशल मीडिया, वाचन, कवितांच्या वाचनातून मिळणार आनंद,  माझ्या मायमराठीचे मनोगत, काही पर्यटनविषयक माहिती देणारा एखादा लेख, ब्रायटन सारखे आपल्याला अज्ञात असलेले परंतु आपल्या अभिमानाचे प्रतीक असलेले इंग्लंडमधील ठिकाण, आपली भारतीय संस्कृती असे विविध विषय वेगवेगळ्या लेखातून प्रसंगानुरूप हाताळले आहेत. हा विविधरंगी सुगंधी शब्दफुलांचा हार मनोभावे  आपल्यासारख्या माझ्या प्रिय माझ्या वाचकांना अर्पण करतो आहे.  हे माझे पुस्तक आपल्याला आनंद देईल आणि आपण त्याचे माझ्या इतर पुस्तकांप्रमाणेच स्वागत कराल याची खात्री आहे. 

- विश्वास देशपांडे